Արհեստագործական և միջին մասնագիտական կրթական ծրագրեր իրականացնող պետական ուսումնական հաստատություններում ամբողջական դրույքով աշխատող և ատեստավորված մանկավարժների աշխատավարձը կսահմանվի 200,000 դրամ: Ինչպես նաև կգործի խրախուսման համակարգ՝ հավելավճարի տեսքով, որը կձևավորվի ատեստավորման ընթացքում ձեռք բերված միավորներից։ 

Կրթության, գիտության, մշակույթի և սպորտի նախարարության կողմից արդեն իսկ մեկնարկել է մանկավարժների վերապատրաստման և ատեստավորման գործընթացը 4 ուղղություններով՝ ոսկերչություն, խոհարարություն, գյուղատնտեսություն և տեղեկատվական տեխնոլոգիաներ: 

Հավելավճարի չափը կախված է ատեստավորման արդյունքից.

• 50% հավելավճար՝ 90-100% արդյունքի դեպքում,
• 40% հավելավճար՝ 80-89% արդյունքի դեպքում,
• 30% հավելավճար՝ 70-79% արդյունքի դեպքում։
  
  

Հավելավճարի պայմանները

Հավելավճարը տրամադրվում է 5 տարի ժամկետով և պահպանվում է նույնիսկ աշխատավայրի փոփոխության դեպքում: Վճարվում է փաստացի դասավանդված ժամերի համար:

Կրկնական ատեստավորում

Մանկավարժը կարող է կրկին մասնակցել ատեստավորման գործընթացին՝

• պահպանելով հավելավճարի չափը նույն արդյունքի դեպքում,
• ստանալով նոր հավելավճար ավելի բարձր արդյունքի դեպքում,
• պահպանելով նախկին հավելավճարը ավելի ցածր արդյունքի դեպքում։
  
  

Լրացուցիչ պայմաններ

• Համատեղությամբ աշխատելու դեպքում հավելավճար տրամադրվում է յուրաքանչյուր աշխատավայրում:
• Հավելավճարը հաշվարկվում է աշխատավարձի անվանական արժեքից՝ ներառելով բոլոր հարկերը և պարտադիր վճարները:
  
  

ԿԳՄՍ նախարարության այս նախագիծը հաստատվել է Կառավարության կողմից և ուժի մեջ է 2024 թվականի դեկտեբերի 5-ից։